Pituffimmi Greenlandic Heritage Week 2025-imi ataqatigiinneq, kulturi ataatsimoorlunilu peqataaneq pillugu nalliuttorsiutigineqarpoq
Tusagassiuutinut nalunaarut
Apriilip 17-ianiit 20-ata tungaanut Pituffik Space Base ukiumoortumik aaqqissuunneqartartumut Greenlandic Heritage Week-imut qaaqqusisuuvoq, taannalu tassaavoq aalaakkaasumik kultuuri, suleqatigiinneq aamma ataatsimuussusermut anersaap nalliuttorsiutiginera. Ukioq manna aaqqissuussap Qaanaami nunaqarfinnilu qaninnerusuneersut aammalu sulisut Danmarkimeersunit, USA-meersunit Kalaallit Nunaanneersunillu katersuuffiuvoq, sapaatip akunneralu ingerlanera pingaarutilinnik avitseqatigiinnermi misigisanillu puigunaatsunik imaqarpoq.
U.S. Space Force-imit aaqqissuussaq Inussuk A/S-imit tulluusimaarluni taperserneqarluni ingerlanneqarpoq, sammisanillu assigiinngitsunik assigiinngitsunullu naleqquttunik imaqarluni – naalagiartitsinernik, kulturimut tunngatillugu nalliuttorsiornermik, timersornermi aaqqissuussinernik meeqqanullu sammisassanik imaqartoq.
Sapaatip akunnerani pisussat pingaarnersaasa ilagivaat nerisartagarisanik avitseqatigiilluni nereqatigiinneq, sikukkut qimusserneq, poorskip manniinik ujaasineq aammalu nuannarilluarneqartoq iffiukkanik uunnattakkanik kinguleqqiutitorneq. Pisimasut allat ilagaat timmisartumik takornariartitsineq, silami pinnguaatersorneq, sanalukkanik tuniniaaneq, meeqqanullu assigiinngitsunik aaqqissuussinerit soorlu "Meeqqat suliffimmut peqatigalugit" aammalu titartakkanik unammisitsineq. Sapaatip akunnera naggaserneqarpoq naggataarnersionermik, eqqugassanik makitsinernik, akissarsianik tunioraanernik aammalu ataatsimoorluni nerersuaqatigiinnermik. Tassanilu nalliuttorsiutigineqarpoq aaqqissuussap ingerlanerani peqataasut akornanni attaveqatigiinnerit annertuumik pingaaruteqartut pilersinneqarnerat.
USA-p Nuummi konsulatiani Public Affairs Officer -iusoq Adam Bentley peqataavoq, imatullu oqaaseqarluni:
"Greenlandic Heritage Week tassaavoq Pituffik Space Basemi aamma qanittuani nunaqavissut akornanni oqaluttuarisaanermi ileqquusoq, ataatsimoorfiusoq aamma kultuurikkut nalliuttorsiorfiusoq. Ilaquttariit ataatsimooqatigiillutik kattunneratuulli assinganik misiginarpoq - amerikamiut, danskit kalaallillu peqataasut ataatsimoorfigisaat. Inuit akornanni misigisaq malunnartoq tassaavoq ataqqeqatigiinneq suleqatigiinnerlu.”
Mr. Bentley-ip kulturikkut pingaaruteqassusia ersersippaa oqarlunilu:
“Misigisat tamakku qujamasunnermik tatigeqatigiinnermillu annertusaataapput. Nereqatigiinnikkut, pinnguaqatigiinnikkut piffissamillu atueqatigiinnikkut immitsinnut paaseqatigiissinnaanerput annertusartarpoq attaveqatigiinnerlu ataavartoq pilersillugu. Puujunngisaannassavara qimussinik sukkanniunneq – issittumi nuissat ataanni ataqatigiissutsimut ilisarnaataasoq pissanganartoq.”
Inussuk A/S-imi praktikkertoq aaqqissuussinermi kultuurikkut ataqatigiissaarisuuvoq oqaluttaalluni suleqataanikkut, sakkutooqarfimmi sulisut aamma nunaqavissut akornanni attaveqaqatigiinnikkut aqqutissiuisuulluni. Sullissinerata qulakkeerpaa oqaatsit tunuliaqutillu akimorlugit ileqquusut oqaluttuallu avitseqatigiissutaaneri, akuutitsinermullu anersaaq annertusarlugu.
Greenlandic Heritage Week 2025-p aammaarluni takutippaa, issittumi avinngarusimasumi inuiaqatigiit ilorrisimaaruteqarsinnaasut ataatsimoorluni ileqqutigut, ataqqeqatigiinnikkut naapinnerullu nuannaarutigineratigut.
Inussuup tulluusimaarutigaa nalliuttorsiornermut akuulluni peqataanera, qutsavigalugillu aaqqissuussamut peqataasut tamarmik, iluatsilluartumik ingerlanneqarneranut tamarmik qulakkeerinneqataammata.
Qujanaq Greenlandic Heritage Week nalliuttorsiutigalugu peqataalluarsimagavit!
Assiliisut: Inussuk A/S & USA-p Nuummi konsulatia